زواية خاصة

من طرف **3del** الثلاثاء 27 فبراير 2018, 3:55 am

الحياة مبتقفش علي حد.. ومحدش بيموت ورا حد ..

جمله من يوم ما وعينا على الدنيا بنسمعها .. والجمله دي فعلا حقيقه .. احنا فعلا حياتنا مش هتقف ، وهنكمل الحياه ، بس الحياه هتكمل وهي ناقصه حاجه ، هنفضل عايشين بعدهم وقلبنا هيفضل ينبض بس هينبض وهو جواه جرح وآلم ..

الحياه فعلا مبتقفش على حد بس كل حاجه حوالينا هتتغير ، احساسنا بالحياه هيتغير ، طعم الفرحه هيتغير وطعم الدنيا كلها هيتغير ..

مين فين مفقدش شخص غالي علي قلبه ؟ ، مين فينا الموت مفرقش بينه وبين ناس بيحبهم ؟ ، الفراق امر حتمي وطول ماحنا عايشين بنفارق .. وبرضه طول ماحنا عايشين هنفضل نفتكر اللي فارقونا ..

لما تعدي من شارع جمعكم فى يوم او تروح مكان كنتوا بترحوه مع بعض وتفتكر ذكرياتكم عينك هتدمع وهتتوجع بس هتفضل عايش .. لما تسمع موسيقى حبتوها سوا هتتوجع بس برضه هتفضل عايش .. لما تفتكر ايام سعيده كانت بينكم برضه هتتوجع بس هتفضل عايش .. حتي الاحلام اللي كنت بتحلمها وشاركوك فيها لما تحققها فى بُعدهم مش هتحس بالفرحه اللي كان ممكن تحسها وهما جمبك ..

وهتفضل الايام تمر .. وهتفضل السنين بتتعاش ، وهيفضل الوجع فى القلب مش بيخف .. وهنفضل عايشين من بعدهم ، بس عايشين ناقصين حته ، عايشين من غير روح ..

لما حد يقولك متزعلش وانسى ، اضحك فى وشه وامشي ومتحاولش تتناقش .. اصل ازاي ننسى ويعنى ايه اصلا ننسى !!

مش هينفع نصفر عداد الحياه ونبدء من الاول وننسى اللي فات ، مش هننسى .. والعداد مش هيتصفر .. بس هنعيش وهنكمل .. وهتصبرنا شوية الذكريات اللي بينا ، والكام صوره اللي اتصورناهم ومكناش عارفين ان هما اللي هيبقولنا وان الناس اللي كانت بالنسبه لينا حياه هيجي يوم ويبقوا شويه صور وذكريات ..