رحلتي مع هادية ( ما لا عين رأت )

تفتكروا لو انا بحب حد أوي ونفسي أكرمه برحلة هوديه فين ؟
ايوه فكروا معايا بجد انا محتارة ..~

انا قعدت افكر كتير مش لقيت غير رحلة العمر دي هي اللي تستاهل الصحبة الطيبة وتستاهلك هادية ~
انا عارفه إن الكلام كتير أوي المرة دي في رحلتنا

بس والله العظيم دا أهم وأجمل كلام ممكن تسمعوه فيها
يمكن مجاش ع بالكم اصلا   الرحلة دي .. لكن صدقوني  الرحلة دي أي حد فينا يتمنى يروحها
وهي دي الرحلة الاكيدة لينا كلنا بإذن الله ~


الجنـــــــة


ايوة كلنا
كل المسلمين كل امة محمد عليه الصلاة والسلام داخله الجنه
بس مش كلهم هيدخلوها من أول مرة للأسف


تعالي هادية  نحلم
تعالي نتخيل ونسرح سوا

تعالوا انتوا كمان عيشوا معانا
عيشوا لحظة دخول الجنه

مش هيكون من خيالي ولا خيالك
لا دا مذكور في القرءان والسنه


دلوقتي حبيبتي الحمد لله
خلصنا مرحلة تطاير الكتب والحساب ووزن الحسنات وعدينا الصراط كمان بسلام الحمد لله
والحمد لله احنا من أهل الجنة
شايفه هاديه ~
شايفه اللي انا شيفاه ده
ايوه دي الجنة ليها 8 ابواب

ياترى اي باب هينده لنا عشان ندخل منه
انا سمعت ان في ناس ال 8 ابواب كلها هتنده عليهم

بصي هادية شايفه الباب الكبير اووووي ده شكله جميل اوي  


معقول هو ده باب الجنة ؟
سبحان الله


بصي بصي
شايفة مين  هناك ؟

ايه ده سيدنا ابراهيم اهو ابو الانبياء
والانبياء كلهم اهم ..!!
ومين ده ؟
سيدنا ابو بكر الصديق و سيدنا عمر بن الخطاب و الصحابة وآل البيت
دي السيده عائشة والسيده خديجه
الله الله .. الف حمد وشكر ليك يارب
جمعتنا بيهم في الحياة الاخرة

ايه دا بابا اهو وماما كمان الحمد لله يارب
اخواتي وحبايبي وقرايبي واصحابي كل اللي كانوا معايا بالدنيا الحمد لله شيفاهم اهو


حبيبي يارب


وفجأأأأأأأأأأأأأة
والناس كلها كده واقفة مش عارفين يفتحوا الباب بتاع الجنة
وكل الانبياء بتقول لست لها .. لست لها

يا الله
سيدنا النبي اهو
حبيبي يا رسول الله عليه الصلاة و السلام
جاي اهوووو
هيعدي  من جنبنا اهووو
رايح ع الباب ويقول انا لها .. انا لها

قال عليه الصلاة والسلام والحديث عند مسلم في الصحيح:
{أنا أكثر الأنبياء تبعاً يوم القيامة، وأنا أول من يقرع باب الجنة }


وعند مسلم في الصحيح:
{آتي باب الجنة يوم القيامة، فأستفتح فيقال لي: من؟ فأقول: محمد فيقول: بك أمرتُ ألا أفتح لأحدٍ قبلك }

اهو سامعة يا هادية رسولنا حبيبنا بيخبط ع الباب بيده الشريفه
( يابخت الباب اللي لمس يده الشريفه )

وحد بيرد عليه من جوا
ياترا دا صوت مين الحلو دا

دا صوت خازن الجنة رضوان عليه السلام بيقول مين على الباب؟
الرسول عليه الصلاة والسلام بمنتهى التواضع يرد علي خازن  الجنة : محمد
يرد عليه الخازن: ربنا امرني مفتحش لحد الا ليك انت
ويبدا يفتح الباااب


وسيق الذين اتقوا ربهم إلى الجنة زمرا حتى إذا جاءوها وفتحت أبوابها وقال لهم خزنتها سلام عليكم طبتم فادخلوها خالدين
وقالوا الحمد لله الذي صدقنا وعده وأورثنا الأرض نتبوأ من الجنة حيث نشاء فنعم أجر العاملين
وترى الملائكة حافين من حول العرش يسبحون بحمد ربهم وقضي بينهم بالحق وقيل الحمد لله رب العالمين (الزمر)

ياترى شعوركم ايه دلوقتي؟؟

يااااااااه

طب ايه رايك حبيبتي لو واقفين انا وانتي كده  
ولقينا سيدنا النبي عليه الصلاة والسلام جاي يقول تعالوا انتوا مكانكم مش هنا مكانكم قدام معايا

أقربُكم مني مجلسًا يومَ القيامةِ أحسنُكم خُلُقًا.. صدق رسول الله

قال رسول الله صلى الله عليه وسلم :
أول زمرة تدخل الجنة على صورة القمر ليلة البدر ،
و الثانية على لون أحسن كوكب دري في السماء لكل رجل منهم زوجتان ،
على كل زوجة سبعون حلة يبدو مخ ساقها من ورائها.


شايفة وشك يا هادية عامل ازاي ؟

انتي زي القمر ليلة تمامه

متخيله نورالقمر شكله ايه ؟

ممممم

طيب تيجي نتخيل كمان  هنعمل ايه اول ما ندخل الجنة ؟؟
تبكي من الفرحه
نسجد سجدة شكر
ولا هنجري من السعاده ونحضن حبايبنا  
 ياااه

ايه الريحه الحلوة دي
ايه الوجوه المنوره المشرقة دي
ايه الضحكة الحلوة دي

ايه الصوت دا اسمعي كده


قال النبي صلى الله عليه وسلم:
(( إذا دخل أهل الجنة الجنة ينادى منادٍ: إن لكم أن تحيَوا فلا تموتوا أبدا وإن لكم أن تصِحُّوا فلا تسقموا أبدا ,
وإن لكم أن تشِبُّوا فلا تهرموا أبدا, وإن لكم أن تنعموا فلا تبأسوا أبدا )) رواه مسلم .

ايه دا يعني خلاص مفيش حاجه اسمها موت تاني ابدااااااااا لاي حد خلاص

ومفيش حاجه اسمها انا تعبانه عندي صداع عندي كحة عندي مرض لا خلاص مش هتعب تاني ابدا لا جسديا ولا نفسيا

ايه دا كمان مش هكبر تاني ابدا يعني سني هيقف ع كده 33 سنه
كل اهل الجنه نفس السن محدش هيكبر ولا يصغر خااااااالص مش هعجز وجلدي يكرمش

وكمان ايييييييه نعيم للابد خلاص مفيش ولا لحظة حزن
علطول هيكون بالي مرتاح وفرحانه دانا كنت في الدنيا ليل نهار ادعي ربنا يريح بالي ويفرح قلبي دلوقتي
خلاص مش هشيل هم لاي حاجه اللي هتمناه هلاقيه من قبل ما اطلبه


كفاية سرحان بقى
يلا علشان ندخل  القصر بتاعنا



ـ الجنة بناؤها لبنة من فضة و لبنة من ذهب و ملاطها المسك الأذفر
و حصباؤها اللؤلؤ و الياقوت و تربتها الزعفران من يدخلها ينعم لا يبأس و يخلد لا يموت لا تبلى ثيابهم و لا يفنى شبابهم .
(صحيح)


تخيلي بقى حاولي
القصر اهو طوبة دهب وطوبة فضة والمونة بينهم عبارة عن المسك .. تخيلي الريحه وتخيلي النور
والحصى هو اللؤلؤ والياقوت
اللي بيتباع بمئات الالاف وبالملايين كمان
هيكون مجرد حصىىىىىىىىى في قصرك


قال النبي صلى الله عليه وسلم:
(( قال الله تعالى : أعددتُ لعبادي الصالحين ما لا عين رأت , ولا أذن سمعت , ولا خطر على قلب بشر ))

واخده بالك من كلمة اعددت؟؟

احنا دلوقتي عمالين نتخيل ونحلم
خيالي وخيالك وخيالنا كلنا لو جمعناه ع بعض برده مش هنوصل للصورة الحقيقيه للجنه اللي هي اجمل من كل التخيلات

ياترى ......
ادني اهل الجنة منزلة مين؟؟

مين اقل واحد واقل منزلة في الجنه ؟؟
مش واحد مننا باذن الله بس تعالي اعرفي اقل واحد هياخد ايه عشان تقولي الله سبحان الله اومال احسن واحد هياخد ايه واحنا ايه؟؟

ففي الصحيحين
{رجلٌ يمكث في النار من الموحدين فيخرجه الله، يقول: يا رب! أخرجني من النار؛ قشبني ريحها وأحرقني ذكاؤها،
فيقول الله: أتسأل شيئاً يا بن آدم بعدها؟
قال: لا والله يا رب، فيعطي ربه المواثيق فيخرجه، فينظر إلى أبواب الجنة،
قال: يا رب! قربني من أبواب الجنة، قال: أتسأل غيرها؟ قال: لا.
والله يا رب
فيعطيه ربه المواثيق فيقربه، فينظر إلى نعيم الجنة،
قال: يا رب! أدخلني الجنة!!
فيتبسم عليه الصلاة والسلام،
فيقول الله: ويلك يا ابن آدم ما أغدرك أما أعطيتني العهود والمواثيق بأن لا تسألني شيئاً،
فيقول: يا رب! لا تجعلني أشقى خلقك فيدخله الله الجنة،
فيقول الله له: تمن، فما يزال يتمنى والله يذكره حتى تنقطع به الأماني، فيعطيه الله عز وجل خمسة أمثال ما تمنى }
وفي حديث أبي هريرة : {عشرة أمثاله } لأن الحديث رواه أبو هريرة وأبو سعيد وهو في الصحيحين .

ادني اهل الجنة منزلة
هو اخر واحد من المسلمين هيخرج من النار والعياذ بالله
وكل ما ييجي يخرج النار هتشده ويتحرق تاني

ياترا دا عمل ايه ف دنيته؟
مكانش بيصلي؟؟
ولا كان سرحان عن ربنا بالعيال والدنيا؟
ولا عمل ايه؟

هيطلب من ربنا : يارب اخرجني من النار
ربنا سبحانه وتعالى هيرد عليه ويقوله هتطلب حاجه بعدها؟
هيقول : لا والله يارب لو خرجت خلاص مش هطلب اي حاجه تانيه
ربنا هيخرجه فعلا وبعد ما يخرج هيبص ع ابوب الجنه وهيقول: يارب قربني من الجنه اقعد على بابها


ربنا سبحانه وتعالى هيرد عليه ويقوله هتطلب حاجه بعدها؟
هيقول : لا والله يارب لو خرجت خلاص مش هطلب اي حاجه تانيه
فعلا ربنا يقربه

الراجل يبص كده وهو قاعد ع الباب يبص ع الجنه من جوا ويشوف الناس الفرحانه والنعيم ودا بيلعب ودا بيجري ودا في النهر .......
يارب ادخلني الجنه



ربنا سبحانه وتعالى هيرد عليه انت مش قولت خلاص مش هطلب تاني ؟
يارب لا تجعلني اشقى خلقك
بصي بقى رحمة ربنا اللي جاية دي: هيطلب منه ربنا عز وجل ويقوله تمنى.. عايز ايه في الجنه بتحلم بايه ؟

يبدأ الراجل يقول كل اللي نفسه فيه عايز كذا وكذا وكذا وكذا وووو لحد ما يخلص خااالص
وهيبدأ ربنا يفكره بحاجات تانيه مقالهاش وكان نفسه فيها وبعدين يقوله انت ليك في الجنة مثل اكبر ملك من ملوك الدنيا

اكبر ملك من ملوك الدنيا دا يطلع عنده قصور اد ايه ومليارات اد ايه وخدم وملوك ودهب وماس وووووو

طبعا الراجل هيستغرب مش هيستغرب كرم ربنا طبعا لا هيستغرب لانه عارف نفسه وحش اوووووووووي
ودا كتير اووووووووووي عليه لدرجة انه
هيقول لربنا سبحانه وتعالى : اتهزأ بي وتسخر مني يارب وانت رب العالمين؟

ربنا الكريم يقوله انت ليك مثل ملك ملوك الدنيا ومثله ومثله ومثله ومثله .. الراجل هيقوله رضيت يارب رضيت
ربنا يقوله انت ليك مثل الدنيا وعشرة امثالها

يااااه
دا اقل واحد؟؟
اقل واحد؟؟

سبحانك يارب

لَهُم مَّا يَشَاؤُونَ فِيهَا وَلَدَيْنَا مَزِيدٌ..

نفسك في ايه هادية بالجنة ؟
نفسك تعزمي سيدنا النبي بالنة وزوجاته و الصحابه واحبابك وتضحكي وتاكلوا وتشربوا ؟

نفسك تحبي ؟

عن علي رضي الله عنه أن رسول الله صلى الله عليه وسلم قال :
إن في الجنة لسوقا ما فيها شراء ولا بيع إلا الصور من الرجال والنساء فإذا اشتهى الرجل صورة دخل فيها .
رواه الترمذي

نفسك تكوني جميلة اوي ؟

عن أنس بن مالك أن رسول الله صلى الله عليه وسلم قال
إن في الجنة لسوقا يأتونها كل جمعة فتهب ريح الشمال فتحثو في وجوههم وثيابهم فيزدادون حسنا وجمالا
فيرجعون إلى أهليهم وقد ازدادوا حسنا وجمالا فيقول لهم أهلوهم والله لقد ازددتم بعدنا حسنا وجمالا فيقولون
وأنتم والله لقد ازددتم بعدنا حسنا وجمالا

وَلَوْ أَنَّ امْرَأَةً مِنْ أَهْلِ الْجَنَّةِ اطَّلَعَتْ إِلَى أَهْلِ الأَرْضِ لأَضَاءَتْ مَا بَيْنَهُمَا وَلَمَلأَتْهُ رِيحًا وَلَنَصِيفُهَا عَلَى رَأْسِهَا خَيْرٌ مِنْ الدُّنْيَا وَمَا فِيهَا "
رواه البخاري


وايه كمان
مفيش حاجه اسمها انا زهئت او مليت
لالالالالا
إن أصحاب الجنة اليوم في شغل فاكهون هم وأزواجهم في ظلال على الأرائك متكئون لهم فيها فاكهة ولهم ما يدعون..يس

في شغل فاكهون يعني مشغولين بالنعم مش عندهم وقت بيستمتعوا في كل لحظة بمتعه جديده


تخيلي اصلا المناظر اللي هتكون حوالين قصرك في الجنه واللي هيتغير كل شوية


بتحبي ايه في الفاكهة طيب  ؟
بتحبي المانجة زيي ؟

انا باذن الله ناوية في الجنة ازرع شجرة مانجه باسمي قصاد بيتي

طيب شراب اهل الجنة ايه ؟

قال الله تعالى
( وأنهار من خمر لذة للشاربين)
فخمر الجنة لا يذهب العقل بل طعمه لذيذ فيه لذة للروح .
شراب أهل الجنة ..
الماء والعسل واللبن والخمر والزنجبيل والكافور وشراب من تسنيم وشراب من سلسبيل  

هادية ..
انا بحب اسافر واشوف حاجات جديده
متهيالي جولة حول الجنة تاخد وقت اد ايه
وانا عارفه ان الجنه كبيرة اوووي اكبر مما اتخيل

سَابِقُوا إِلَىٰ مَغْفِرَةٍ مِنْ رَبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ ۚ ذَلِكَ فَضْلُ اللَّهِ يُؤْتِيهِ مَنْ يَشَاءُ ۚ
وَاللَّهُ ذُو الْفَضْلِ الْعَظِيمِ ..الحديد

اعرف انك بتحبي البحر اوي ..

انا كمان بحب البحر اووووووووي فهجيب يخت في البحر ويكون بتاعي واعزم فيه صحابي في الجنة ونضحك سوا ونهزر ونفرح

بصي بقى اخر حاجه هنختم بيها واجمل من كل اللي فات والله العظيم
لو هي لوحدها بس اللي ربنا هينعم علينا بيها المفروض نقضي الباقي من حياتنا نحمده وندعيه ما يحرمنا منها

عن صهيب الرومي - رضي الله عنه - :
أنَّ رسولَ الله -صلى الله عليه وسلم- قال:
«إذا دخل أهلُ الجنّةِ الجنة ، يقول تبارك وتعالى : تريدون شيئا أزيدُكم ؟ فيقولون :
ألم تُبَيِّضْ وجوهَنا ؟ ألم تُدخلْنا الجنةَ وتنجِّنا من النار ؟ قال: فيكشف الحجابَ ، فما أُعْطوا شيئا أحبَّ إليهم من النظر إلى ربِّهم تبارك وتعالى».
زاد في رواية : ثم تلا هذه الآية : {للذين أحسنوا الحسنى وزيادة} [يونس:26] أخرجه مسلم والترمذي.


لذة النظر الى وجه الله الكريم
يااااااااااه

بجد مفيش كلام ممكن يتقال خلاص

جنة الخلد ولذة النظر الى وجه الله الكريم هي رحلتنا انا وهادية
واتمنى من الله ان يجمعنا واياكم في تلك الرحلة