محتاج مساعدة !!

بعد السلام والكلام والصلاة و السلام على أفضل البشر سيدنا محمد
عليه افضل الصلاة والسلام
من الاخر كدة انا جاى وعامل الموضوع ده عشان اى حد يدخل 
المنتدى يتبرع ولو بجنيه
الموضوع كبير اوى اوى اوى و عاوزين تبرعات كتيرة اوى اوى
المشكلة عويصة يا جدعان
اتبرعووووووووووو

شفت شحات ..
تقريبا جاله الهتهات ..
قلت أروح أسأله يمكن أعوضه
أى حاجه عن اللى فات ..
نفسك فى إيه يا غلبان ..
تأمرنى بإيه يا حج ..
رد عليا وقالى ومين قالك إنى حج ..
ده أنا من يوم ما وعيت على الدنيا ..
معرفش غير إنى ليا رب ..
دعائى ليه فى السما بيرج ..
طب إسمك إيه وعايش كده ليه ..
وليه عمال تلعن وتسب ..
رد عليا وقالى هوا لوحده اللى عالم ..
أما أنا فسميت نفسى سالم ..
منا كتير اتسميت قبل كده كمان ..
وزى ما إنته شايف عايش عدمان ..
ومش ندمان ..
ضميرى مرتاح ..
عايش فى الشارع فى أكبر براح ..
والخلق حواليا أنا بتونس بيهم وهما بيخافو منى ..
اللى بيقفلوا شباك عربيتهم .. وإللى بيعمل مش شايفنى ..
وإنتة جاى تسألنى .. متسألش على حاجه سبنى ..
ربنا يسهلك يا ابنى ..
يا سالم أنا مش بشحت
ده إنته يوم ما تموت
مش هتلاقى حتى حد ليك فى التراب يفحت
تاخد فلوس ..
رد قالى وعلى الناس أدوس ..
يا عم راسك أبوس ..

إنته عايز إيه .. نفسك فى إيه
نفسى نحب بعض ..
منعضش فى بعض ..
نفسى واحد زائد واحد يساوى إتنين ..
ده فى إيدين .. رجلين .. عنين ..
أنا شمال بس مين إللى بترلى اليمين ..
مين إللى رمانى هنا جنب سيدنا الحسين ..
زى الكلاب بقالى سنين ..
نسيت إنى بنآدم يابنى آدمين ..
نفسى أفكر وأغير وأجرب ..
نفسى أجرب
نفسى أتدرب
نفسى أتعلم .. مش أتألم ..
نفسى أعيش إن شا الله فى طاقه ..
نفسى أعمل بطاقه ..
نفسى أكل حاجه حلوه ..
أنا أسمع عن حاجه إسمها البسبوسه
نفسى أعجب بنت حلوه
نفسى فى عروسه ..
وأعرف إللى ليا وإللى عليا ..
وأهم حاجه إن كل ده يحصل من غير كوسه ..
نفسى محسش إنى عايش عكس الزمن ..
نفسى ألبس توب ..حتى إن كان كفن ..

عرفت إللى فى نفسى .. هتقدر تعملى حاجه ..
يا بنى ما انته زيك زيى .. وزى كل الناس محتاجه ..
واللهى يا سالم جبتلى الهتهات ..
إزاى نسيت إنى أنا أساساً شحات ..

ده كلو عشان قولت عاوز جنيه ؟؟
يا دينى