تجربتي في الربح من الانترنت

من طرف **ahmed 22** الجمعة 17 مايو 2019, 2:45 am

شو خباركم

ان شاء الله طيبين

ورمضان كريم عليكم اجمعين

وبما ان فاضل علي السحور ساعتين قلت اتسلي طالما مش عارف انام

وحبيت اشارك نفسي والفراغ تجربتي في الربح عبر الانترنت

الموضوع عامة متوجه للمهتمين بالموضوع ..

طبعا انا عارف ان العنوان هيجيب سريخ مشاهدات وبتاع ويعمل تريند في جوجل سيرش

مش اكيد يعني عشان انا اللي كاتبه وكدا

بس ده عامة متوقع ..لأن عامة الناس بتنجذب لهكذا عناوين

لأن الربح عبر الانترنت بالنسبة للجاهل بيه يعني دولارارات و يوروهااات سهلة

بس الاكيد والغالب هو شلنات

جاتلي فترة كدا من كام شهر كنت بستغل وقتي الفراغ بتاعي عن طريق اني

بعمل استكشاف لمواقع الربح عبر الانترنت .. والموضوع ده شغلني جدا لدرجة

اني كنت فعلا عاوز اعمل كدا ويبقي مصدر دخل تاني ليا مثلا مع شغلي بسبب بقا العناوين

الجذابة علي اليوتيوب وبتاع وكدا ..

بس اكتشفت اني ماعنديش الدافع كفاية

ولا الصبر .. وبالتالي مليت .. لأن الموضوع محتاج صبر ووقت طويل انا في غني عنه

عشان تدخل اول شلن في جيبك ... وممكن ياخد سنين من المعافرة كمان ..

وعلي حسب حظك يعني ومدي دافعك ..

بس مع ذلك انا جربت تقريبا معظم المواقع والأفكار وخدت فكرة كبيرة عامة

بس اول شئ لازم اي حد حابب يجرب أنه لما يحب يتعلم طرق الربح عبر الانترنت

ياخد الطريقة من الناس اللي بتشرح ومايخدش معاه صورة الارباح اللي بيقولوها ...

المهم اول ملاحظة اكتشفتها اني تقريبا اتأخرت في مجال الربح ده حوالي 3 سنين مثلا

يعني لو كنت بدأت من 3 او 4 سنين كانت هتكون حظوظي اوفر وفرصي اكبر

لأن غالبا المواقع الحقيقية اللي فيها الربح فرصه اكبر بقا ليها كيان

واعضاء اكبر من انها تستوعب جديد الا اذا انت شخص محظوظ بنسبة الف المية

ومش شرط كمان انك تتقبل في المواقع وتسجل فيها أنك تقدر تستوفي شروطها

يعني لازم يكون عندك الامكانية اللي تجاري اللي قبلك فيها ..

يعني ممكن تتقبل في الاول ولو مثلا ماكنتش علي القدر او تعديت علي حقوق ملكية الغير

او سرقت تصميمات او غيره هيطردوك بعد كدا ..

انا طبعا مش هكلم عن اليوتيوب وانك تكون مثلا يوتيوبر او انفلاونسر علي السوشيال ميديا

لأن دي حاجات تتعلق بامكانياتك الشخصية ومدي قدرتك أنك تواجه شاشة وتكلم الناس

وبين انك شخص خجول او متمكن وعندك كريزما وموهبة ... تقدر من خلالها تقدم

محتوي مختلف يجذب الناس سواء اسكتشات كوميدي او محتوي تنموي او معرفي او فلوجات ..

وتعمل قناة وتربطها علي ادسنس وبتاع .. او حتي في كمان ممكن تعمل بلوجر

وتربطها برضه علي ادسنس ومن خلالها ممكن تجيب فلوس برضه

بس انا سجلت علي بلوجر وكسلت اكتب الصراحة ..

بس عامة اهتمامات القراءة قليلة فهتلاقي مكسبها قليل وخصوصا لما تعمل بلوجر مصري

يعني لو عملت بلوجر بلغة اجنبية او الفت كتب الكترونية اجنبية وبتاع هيكون ليك حظوظ

اعلي لأنهم بيبحبوا القراية برة اكتر ...

وفي طرق أنك تعيد صياغة مقالات موجودة وتغير من شلكها او كتب عن طريق مواقع معينة كدا وتضيفها علي البلوجر الخاص بجوجل

او تضيفها علي مواقع لبيع الكتب الالكترونية علي امازون مثلا .. وتعمل لوجو للكتاب

جذاب كدا والحمار بقا اللي يشتري

بس طبعا دي قلة ضمير يعني .. وبرضه فلوسها قليلة علي حد علمي ..

والواحد برضه عمره ما هيستهلك نفسه وذمته في شوية نصب

المهم نرجع لليوتيوب

ومع ذلك حتي أنك تكون يوتيوبر او غيره في ظل الاف موجودين عامة حاليا

هو أمر صعب بسبب اصلا تشابه المحتوي اللي بيقدمه معظمهم

واصلا نسبة الارباح من المشاهدات في اليوتيوب وغيره بيتعلق اكثر

بأشياء اكبر من انك تجيب مشاهدات وبس ...

يعني المشاهدات دي منين .. يعني لو اكتر متابعينك من بلد زي مصر

هتلاقي الربح قليل .. غير لما تلاقي متابعات من امريكا وغيره

وبرضه منصة زي اليوتيوب بتختار محتوي انت بتقدمه

شايفه انك ممكن يليق انه يتحط عليه اعلان او لاء وهي اللي بتحدد

بسبب انه ليه عامل جذب لفئة معينة في مكان محدد في وقت محدد ..

يعني انت ممكن تلاقي فيديو معين مشاهداته ضعيف مكسبه اعلي

من فيديو تاني مشاهداته اعلي بكتير لاسباب دعائية خاصة باليوتيووب

وعامة انت ما تقدرش تعتبر اليوتيوب مصدر رزق ليك

غير لما تتعدي مثلا حوالي نص مليون سبسكرايبر بمحتوي متجدد

وطبعا هو عامة المكسب الحقيقي من اليوتيوب

هو لما مثلا واحد يتواصل معاك ويقولك اعملي اعلان مثلا

لتطبيق زي ميوزكلي او اطلب بتاع الاكل ويديك مقابل لده وده يعتبر شئ مرحلي

مش هتقدر تكمل فيه للنهاية الا اذا ..

ان اليوتيوب بقا منصة ليك لحاجة اكبر سواء انك تقدم برنامج او تدخل بقا عالم التمثيل والسينما

يعني هو طموح محدود بسقف توقعات الغير فيك

ومدي ايمانك الكامل بقدراتك اللي تخليك تبدأ وتكمل وتخليه مصدر رزق دائم ليك

يعني مجازفة بما تملك وقد لا تملك ..

بس انا هكلم علي الحاجات اللي بتتطلب الاجتهاد اكتر وجربتها ..

يعني انا جربت حاجتين

1 - قالك احسن طريقة اللي هي عن طريق merch by amazon

الموقع ده كنز حقيقي للي قدر ينجح فيه ... وفعلا فيه ناس كسبت فيه مثلا

في شهر واحد اكتر من 10 الاف دولار او غيره ...

الموقع تابع لشركة امازون اللي هي مقرها امريكا

اللي هي يعني من الاخر موقع للتجارة الالكترونية

وموقع امازون فيه اكتر من خاصية للربح عن طريقه واسهله واكثره شيوعا

اللي هو الميرش باي امازون اللي هو ببساطة انت بتعمل فيه تصاميم للتشيرتات

وتعرضها عن طريق موقع امازون وده بيتطلب منك ببساطة انك علي الاقل تكون

عندك خبرة في الفوتوشوب او الجيمب والتصميمات عامة مش شرط تكون رسومات

ممكن تكون كلام او حكم مؤثرة بس بتصميم جذاب زي ما بنشوف علي البرينت بتاع التشيرتات كدا

ولما الناس تختار تصميم من اللي بتنزله

امازون بتتولي انها تطبع التيشرت

وتبعته للي اشتراه وبتستغل انها اكبر منصة علي الانترنت عليها اقبال

يعني هي بتعمل كل حاجة وانت مجرد بتصمم بس

وانت بتاخد عمولة ممكن تبدأ من 3 دولار الي 7 او 8 علي حسب

ما بيتم تحديدها علي كل تيشيرت ...

مع العلم أنك لازم تراعي انك بتبيع التشيرتات دي لامريكان او اروبيين

بمعني أنك لازم تكون عارف انت بتخاطب مين وايه مناسباتهم

او الاحداث المهمة الموجودة عندهم سواء سياسة او اقتصاد حتي ..

يعني ممكن تلاقي ترامب مثلا عليه جدل .. فممكن تطبع تشيرتات

بأفكار او نقد يخص ترامب ...

يعني علي سبيل المثال ممكن تطبع تشيرت مكتوب عليه

dont let america Trump again

بتصميم بقا مميز وكدا

وكذلك لو مثلا الكريسماس او مثلا عيد الارض

حاجات بقا تخص عاداتهم اوهتمامتهم

مش اهتماماتك انت اللي في مصر يعني ..

يعني الكلام ده لو اتقبلت اصلا ..

المهم

طبعا الكلام اللي بقوله ده يخلي كل الناس تروح بكرة الصبح تتعلم الفوتوشوب

لو مش عارفاه .. وتسجل بعد بكرة عالموقع

وتحسب بقا حسابات الثروة اللي هتكسبها وهكسب كام في الشهر وافلام هندي كتيرة ...

انا بقا واحد زي الاف الناس اللي اكيد اترفضت من الموقع اصلا

قبل ما حتي تفكر يشوفوا تصميم واحد ليك ...

بمعني ان اولا التسجيل في الموقع ليه خطوات وبتمشي فيه

ولازم الاول يكون ليك حساب علي بايونير اللي هو بنك الكتروني امريكي وده اسهل حاجة يعني

واحسن من الباي بال وده الموقع بيبعت ليه ارباحك ومن خلال البنك ده بياخد نسبة

وبيبعتوا علي البنك الخاص بيك في مصر علي رقم حسابك ..

وده سهل وتربطه في التسجيل علي الموقع ..

تاني هام حوار الضرايب وده الصراحة هما بيوفروا عليك غير

كل المواقع التانية اللي بتتطلب منك عادة ورقة ضرايب وتبعتوا ليهم وحوار كدا ..

هما بيخصموا الضرايب فوري

يعني بيخصموا حوالي 30 المية ضرايب من مجموع ارباحك في امريكا

يعني لو كسبت 100 دولار هتاخدهم 70 ده غير طبعا مصاريف

التحويل من الموقع لبايونير بعد كدا عشان تقدر تستلم لما بايونير

يبعت لحسابك في مصر زي البنك الاهلي وغيره ...

حوارات كدا لازمة للتسجيل بس مقدور عليها وبتجيبها عن طريق اليوتيوب

والخطوات موجودة يعني ...

مش بيفضل غير الرسالة التعريفية اللي هي المفروضة بتقولهم فيها

كلام كتير عن نفسك وانك متخصص في الفوتوشوب وصيغة كدا محددة

ومعظم الناس بتقولوا ان الرسالة التعريفية دي هي اللي بيخلوك تترفض او تتقبل

وبرضه هو بيطلب منك رابط ممكن توضح فيه بعض تصميماتك لو امكن

سواء صفحة ليك علي الفيس .. او انك مثلا بقا هتشتري دومين وتنشأ

عليه موقع عشان تقوله أنك هتساعد في تسويق المنتج بتاعك من خلال الموقع ده

كميزة اضافية يعني فيقبلك .. البعض بيقول مهمة والبعض التاني بيقول لاء ..

يعني كله فتي ..

المهم انا شايف انهم استكفوا باللي عندهم واي كلام تاني هري ...

ومش هيتقبل غير اللي هيضيف للموقع بصورة واضحة واستثنائية مش اللي هياخد منه ..

لأن غالبا اللي بيصمموا اكتر من اللي بيشتروا بسبب انها كانت فرصة بتكسب دهب

في البداية وبعد كدا خلاص ..

انت بس بتبعت وتستني منهم رد في حوالي اسبوع

وغالبا لو اترفضت مرة مش هيقبلوك التانية وهما بيقولولك كدا

حتي لو عملت ايميل جديد بأفلام جديدة .. انت خلاص اتسجلت عندهم سيستم

كان ممكن زمان فيه ثغرات بس حاليا مش موجودة ..

وفيه مواقع كتيرة مشابهة للميرش كدا

زي ريد بابل وتي سبرينغ بس من الاخر كلهم بلح ..

لأن الفرص فيهم اتحددت وهما ماعندهمش الاقبال الموجود علي الميرش ....

لأن عامة المنصات دي موجودة في امريكا واوروبا بس ..

الا في حالة واحد أنك مثلا انفلونسر او يوتيوبر فبتعمل ميرش لنفسك

وتقول للمتابعين بتوعك يا جماعة انا ليا ميرش بالشعار بتاعي

وعلي فكرة ممكن تلاقي تصميم بسيط جدا ولمجرد انه يخص شخص معين

ليه متابعين بيتباع عشان بيحبوه مثلا

وبيصممه علي موقع مثلا زي تي سبرينغ ويا جماعة

انا محدد 300 قطعة وبتاع ودول اكثر ناس عامة بيكون ليهم مكسب

انهم بيستغلوا منصتهم في البيع وجذب الناس انها تشتري اونلاين

الميرش بتاعهم ..

2 - جربت برضه freelancer انك تشتغل علي مواقع محددة خاصة

بعمل الفري لانسر وكدا ...

يعني تروح تسجل في موقع زي Freelancer.com

او upwork.com

وهتلاقي اختصاصات كتيرة جدا لناس عاوزة مشاريع هي مش قادرة

تنفذها لضيق وقتها او عدم قدرتها وبتحدد بادجت معين كفلوس ووقت معين

ما بين يومين او تلاتة .. في مجالات زي الفوتوشوب او الجرافيك

او الترجمة او الابحاث في مجال معين سواء اجتماعي او علمي او الشبكات وحاجات كتيرة تانية

ممكن تلاقيها غريبة زي مثلا تعمل داون لود لشوية اغاني .. حوارات كدا

وبتعرضها علي موقع خاص بالفري لانسر

وانت وغيرك بتقدموا نبذة عن نفسكم لصاحب المشروع

وبتحاول تقدم اقل سعر كبداية مثلا 5 دولار كمقابل عشان تقدر

تجذب الرجل ليك وتكتب اللي تخليك تستميله ناحيتك وخبرتك

في المجال اللي طالب منه المشروع ..

بس طبعا مش انت لوحدك اللي عارض 5 دولار واللي هي اقل قيمة

ومش انت لوحدك اللي عارض اقل وقت اللي هو يوم مثلا

ومش انت اللي وحدك اللي بتكذب حوالين امكانياتك ..

وثانيا انت ليك تقييم جمب اسمك يعني كبداية انت هتعافر كتير جدا

قبل ما حد يختارك ..

وطبعا كله بالانجليزي لازم يكون معاك لغة اساسي جمب العربي

ولو معاك اتنين وتلاتة يبقي افضل وافضل

ولازم برضه في حاجات تبع الفري لانسر لازم تكتسبها

زي شهادات او اختبارات بتمر بيها وبتدفع فلوس عشان تضيف جمب اسمك

انك مريت بيها زي اختبارات انجليزي او حاجات تبرز امكانياتك عشان تضيف

حافز للناس انها تختارك بجانب لغتك وكدا

الامر طبعا مش فهلوة عامة ..

وحوارات الدفع والتسجيل ليك زي الميرش برضه بيكون ليها اعتبارات

يعني هتحتاج حساب علي الpaybal بفيزا كارت تبعك تسجلها عليه

عشان توثقه وتصرف شوية دولارات في انك تنمي نفسك زي ما قلت بشهادات موثقة من الموقع ..

اوتتبع الطريق الصعب في انك تشتغل من الصفروتكسب من الصفر وده بصراحة

محتااج حظ كبيررررر ...

ولازم تعرف برضه ان الموقع ده ليه نسبة من ارباح مش شغال للووطن يعني ..

مش فاكر هي كام بس هو ليه نسبة محترمة ..

بالاضافة الي نسبة التحويلات البنكية ..

ودي تفاصيل مش هتشوفها عامة علي اليوتيوب من الناس اللي بتشرح

وبتخلي الناس تحلم بدون وعي ...

وتخلي عندهم امال بدون حدود واضحة ..

وانا طبعا الصراحة انا مسجل علي الفري لانسر

بس الصراحة ماليش صبر علي الحاجات دي ولا وقت ...

لأنك محتاج تنفذ كل مشروع وبالذات البدايات بدقة عشان تكون سمعة حلوة

وتقييم مناسب جمب اسمك ... ولازم برضه تكون عارف انك في ملتقي

مختلف الثقافات يعني مش قاعد وسط مصريين وعرب ..

لا انت قاعد في مجتمع اكثر من شرق اسيا والهند وامريكا واوروبا

عبارة عن خلطة كبيرة كدا ..

واللي وضح ليا ان اصلا في شركات ومعظمها في الهند وباكستان وغيرهم

لمجموعات كتيرة من الشباب بتسجل وتتصدي للمشاريع

وعاملين الموضوع ليهم كاكل عيش اساسي ليهم .. فيه مصدر ربح ..

يوازي شركة ...

وفيه بقا انظمة الافيليت اللي هو بتسوق عن طريق العمولة

وبرضه موقع زي امازون fba تبع لموقع امازون زي الميرش كدا وده الصراحة ماجربتوش

لأني ماحبتش الموضوع .. بس خدت فكرة عنه ..

وهو انك مثلا بيكون عندك منتج معين وبتبعته علي شركة امازون

وتقولهم يعرضوا المنتج ده .. وبيكون ليك عمولة

أو انك بتعرض المنتج عادي عن طريق الشركة

وانت اللي بتتولي الشحن للمكان اللي انت عاوزه

عن طريق انك بتعمل استور الكتروني ليك ...

في مواقع كتير زي etsy علي ما اتذكر وكتير يعني المهم

يعني هي لعبة عامة بس اغلبية المستفيدين بصورة اكبر

هتلاقيهم موجودين في الولايات المتحدة او اوروبا

يعني من الأخر بتشتري منتج محدد بالجملة عن طريق موقع كبير

زي موقع علي بابا وتروح تعرضه مثلا علي مواقع

زي ebay او زي ما قلت amazon fba بسعر اعلي وبتاخد نسبة

وهما بياخدوا نسبة ... كدا يعني ..

اعتقد ان حوار زي ده ممكن تلاقي البعض بيطبقوه في مصر بشكل مختلف

يعني يشتروا منتجات محددة من مواقع زي جوميا او علي بابا بسعر الجملة وليكن سماعات مثلا

بسعر رخيص من ناس صينين مثلا ويتشحن لمصر

ويروح هنا يوزوعوا علي محلات الموبايلات مصر

بسعر اعلي .. كتجارة بس مبنية اكتر علي الالكتروني ....

ماجربتوش .. بس ليه ناسه ...

وفيه بقا الربح عن طريق روابط الاختصارات وده غالبا سوق الغلابة يعني

بمعني أنك مثلا بتسجل في مواقع معينة اللي هي خاصة بالروابط...

والمواقع دي مثلا عندها برنامج وليكن علي سبيل المثال متصفح زي جوجل كروم

بتاخد رابط التحميل بتاع جوجل كروم عن طريق الموقع اللي بتسجل فيه

وتوزعه بقا عن طريق المنتديات مثلا عن طريق انك عندك فيس بوك

فيه متابعين مثلا بالالاف .. وفيه طرق كتير بقا

وليك علي كل الف تحميلة مثلا للبرنامج ده عدد دولارات محدد 5 او 10 علي حسب الموقع..

وفيه لعب كتير بقا ...

بس انا شايف حوار الروابط ده مش بيأكل عيش يعني .. مش مجزي

بس هو اسهل الطرق عامة لغالبية اللي بيبدأ ..

ومش بتكسب من اول شهر او اتنين .. انت وشطارتك

وانت ومدي اطلاعك علي الموضوع ..

وانك تشوف فيديوهات كتير عنه وبتاع وفيه امكانية

بس في نصب برضه .. لأنك بتكون تابع لناس في مواقع ومحددة

وفيه مدير وانت زي موظف تابع ليه .

وطبعا المواقع مش كل قرش بتكسبه بيتبعت ليك في وقتها

انت علي الأقل لازم يكون معاك فوق الخمسين دولار قبل ما تفكر تحول فلوسك

من الموقع لحسابك

بس مش بيستهويني عامة حوار الروابط ده ...

عامة

اللي خلاني اكتب الموضوع ده شئ واحد بس ..

هو مدي استفزاز الواحد من الأمل اللي بيتباع ليك من الناس

اللي بتكرر نفس مواضيع الربح علي الانترنت ده

وبتكتب عناوين جذابة عشان شوية مشاهدات تاخدها علي اليوتيوب

فيقعد يقولك مثلا كسبت 10 الاف دولار من خلال مثلا كذا

الحق كسبت الف دولار من خلال الاشتراك في كذا

هو بيديك اللقطة الاولانية ..

واحيانا بيكون محتاجك تسجل عن طريق الرابط الخاص بيه

عشان هو يكسب من طريقك لأنك سجلت من خلاله ليس الا يعني كميزة بعض المواقع ...

قصدي انك لازم تعقل الكلام قبل ما تشتريه

ولما تحب تبيعه ماتيزفيهوش ...

وتعلق غيرك باللي اتعلقت فيه ..

ولما تحب تعرض وتبين للناس أنك بتكسب

لازم توضح ليهم التحديات كاملة اللي هتقابلهم

مش تديهم الوش الحلو بس عشان شوية مشاهدات علي اليوتيوب

واحيانا البعض بيكون مسجل من سنة واكتر

وبينقل تجربته وبينسي ان اصلا التحديثات اللي بتم علي المواقع دي

والتسجيلات والتحكمات اللي بتزيد سنة بعد سنة

هو ممكن مايكونش مدرك ليها ..

خلي الناس تحلم بس بشويش عليها ..

ما أدري كيف جبت صبر تكتب كل ده ازاي ؟

وما أدري ليه قرأته كله للنهاية ؟
يمكن لانك اللي كاتبه ولأني ولا مرة أقتنعت أنه ممكن الواحد يربح من الانترنت .. زمان .
اللي لاحظته من كلامك أنه المهم هي المعرفة والقدرة والثقة ، وبعدها يأتي الربح .

من طرف **ahmed 22** الجمعة 17 مايو 2019, 10:41 pm

فتى المهام الخفية كتب:ما أدري كيف جبت صبر تكتب كل ده ازاي ؟

وما أدري ليه قرأته كله للنهاية ؟
يمكن لانك اللي كاتبه ولأني ولا مرة أقتنعت أنه ممكن الواحد يربح من الانترنت .. زمان .
اللي لاحظته من كلامك أنه المهم هي المعرفة والقدرة والثقة ، وبعدها يأتي الربح .

انا كتبت الموضوع ده امبارح في ساعة متقطعة كدا قبل السحور

بس الظاهر الواحد طبعه انه لأما يكتب المعلومة بذمة لاما بلاها خالص

بس فعلا الموضوع طويل اوي هههههه

بس انا كتبه بنية الافادة

وصدقني في معلومات وتفاصيل ماحدش هيقراها غير هنا

ومش هيفهمها غير اللي .. الي حد ما عنده بعض الاطلاع عالموضوع

بالنسبة للربح علي الانترنت هو طبيعي موجود بنسبة

بس محتاج زي ما قلت كدا المعرفة والقدرة والثقة

بس قبل دول كلهم .... الصبر ثم الصبر

والحظ علي فكرة ليه دور .. لأن الفرص فعلا بقت قليلة

عارف انا مشكلتي اني انسان مش صبور بطبعي

وفي نفس الوقت في حاجة نفسية كانت مانعاني

اني اصرف فلوس في بعض المواقف

قبل ما يدخلي فلوس من النت وده بسبب زي ما انت قلت كدا

الاعتقاد او عدم الاقتناع من جواك انه مافيش مكسب من خلال النت ..

يعني من الأخر انا عاوز ابدأ من غير مخاطر

واللي اكسبه اخاطر بيه بعد كدا ...

لأن الانترنت سوقه عميق واللي بيروح مش بيرجع

واحيانا بتكسب ومتخيل أنه معاك رصيد في موقع معين

وفي الاخر ماتعرفش تحوله ...

صحيح كان عندي تساؤل بخصوص البورصة والاسهم عبر الانترنت ،يعني كذا حد قريب وكتير بيدخلوا الحاجات دي ، ويقولك في كام شهر رصيدنا كذا
بس السؤال فعلا بيحصلوا على الفلوس دي في أيدهم ولا نصب كمان .

ومش الاحسن بذل الجهد والمال في مشروع واقعي وبسيط ومضمون
موزع حشيش مثلا

من طرف **ahmed 22** الجمعة 17 مايو 2019, 10:59 pm

فتى المهام الخفية كتب:صحيح كان عندي تساؤل بخصوص البورصة والاسهم عبر الانترنت ،يعني كذا حد قريب وكتير بيدخلوا الحاجات دي ، ويقولك في كام شهر رصيدنا كذا
بس السؤال فعلا بيحصلوا على الفلوس دي في أيدهم ولا نصب كمان .

ومش الاحسن بذل الجهد والمال في مشروع واقعي وبسيط ومضمون
موزع حشيش مثلا

والله بص يا وليد انا لا افقه شئ بصراحة عن البورصة والأسهم عبر الانترنت

وكل اللي اعرفه عن البورصة العادية انها زي القمار

لأما تديرها بعقل وتحط فلوسك في المكان المناسب لأما تغرقك ..

اما انك تحط فلوسك بواقعية وتوزع حشيش

فأنا بقولك يا اسطا ايدي في ايدك

والربح في ايدي

والكلبوش في ايدك

وربنا ياخد الزعيم القائد بقا

أم الزعيم القائد المبجل

للدرجة الأمور الاقتصادية والحياتية صعبة بزينة البلاد

من طرف **ahmed 22** الجمعة 17 مايو 2019, 11:21 pm

والله لو هنكلم جد

فبالبلد حالها صعب جدا

والناس حالها اصعب ...

عارف انا لما كنت بفكر مع نفسي كدا من يومين

حسيت ان احنا كل ما بنكبر.. بنبعد عن افكارنا اللي كنا بنؤمن بيها

بسبب التهائنا بشغلنا ولقمة العيش وكدا

بنميل اكتر ان احنا نكون اشخاص آمنين

لمنطقة كدا رمادية .. في زون كدا مش حلو

نميل ان احنا نحيد نفسنا عن كل قرار بيتاخد حوالينا

حتي الكلام فيه بقيت تستشعر انه بلا قيمة ..

بنميل ان احنا نبحث للمبرر لنفسنا لقلة نجاحنا

في اننا نشوف غيرنا اللي حالنا من حاله ..

او اللي بيشتكي من نفس اعبائنا

وبنفرح اوي لما نلاقي الشكوي عامة

بنحس ان احنا مش لوحدنا

you are not alone

فاهم انت .. بشوف انا حواليا الكلام ده كتير بحكم اني في السوق وكدا

بنفرح ان احنا متشاركين الخيبة يا جدع

لأنك مش عارف تنجح بنفس الخطوات اللي انت كنت حاططها لنفسك

بسبب قلة الفرص فعليا .. وسيبك من كلام التنمية البشرية ده

بتاع انك تصنع فرصتك بنفسك وبتاع

الفرص بتتصنع لما يتوجد ايمان عام الي حد ما

وده اتفقد والناس بقت بليدة

الطريق اللي ماشية فيه الدولة حاليا

عملت حاجة زي حرب بالوكالة كدا

الحكومة والنظام بصورة غيرة مباشرة

وكلوا طبقات المجتمع انهم ياكلوا في بعض حاليا

تجربتي في الربح من الانترنت

تجربتي في الربح من الانترنت

رد: تجربتي في الربح من الانترنت

رد: تجربتي في الربح من الانترنت

رد: تجربتي في الربح من الانترنت

رد: تجربتي في الربح من الانترنت

رد: تجربتي في الربح من الانترنت

رد: تجربتي في الربح من الانترنت