شبهة بعض

من طرف **3del** الثلاثاء 01 يونيو 2021, 10:10 pm

الجدل مشتعل بين جمهور مسلسل لعبة نيوتن بخصوص هنا وحازم.. ناس بتقول حازم إنسان مُسيء وأذى هنا كتير ومكانش بيديها أي فرصة انها تتكلم أو أنها تقرر أو أنه حتى يسمعها لما تغلط.. وناس بتقول هنا أذت حازم وتستاهل وجهة نظره عنها لأنها بالفعل معرفتش تتصرف وفعلاً بوظت كل حاجة.

في الحقيقة هما الاتنين نفس الشخص، هما الاتنين بيحملوا نفس الصفات ويمكن عشان كدة اصطدامهم ببعض كان قوي ودوي ارتطامهم ولد دوامات واسعة خدت ف سكتها حاجات كتير بما فيهم حياتهم نفسها.

هنا وحازم وجهين لنفس العملة، الاتنين اتربوا في أسر بتقلل منهم، حازم كان بيتقارن باخوه وهنا كان بيتقالها انها لخمة ومبتعرفش تتصرف، الاتنين كبروا وجواهم مشاعر بالمظلومية والاتنين كانوا لبعض كومفورت زوون، والاتنين لما اتعرضوا لضغوطات خارجية خرجت منهم صفات سيئة شبه بعض بالظبط.

هنا قررت تحرمه من أنه يكون شريكها فالتجربة يقوم هو يحاول يحرمها من علاقتهم ويهددها بالطلاق تقوم هي تختفي وتاخد قرارات لوحدها وهو برضو يحتفظ لنفسه بمشاكل الفيزا ومشاكل الشغل هي بتخبي عليه وهو بيخبي عليها.. هي بتترعب من كل حاجة فتصرخ وتصوت ف المستشفى وهو يترعب من فقدها فيبوظ الدنيا ويطلع همه في أمينة وبدر ويقعد يصرخ فيهم، لما بينفصلوا هي بتسرق مؤنس من سارة وهو بيسرق أمينة من بدر، هي بتستغل مؤنس وتسيطر على الشغل وتغير مظهرها وتلبس ملحفة هو بيستغل أمينة وبدر ويشتغل ف المنحل ويغير مظهره وستايل لبسه، وهما بيتطلقوا هي بتعند وتتعمد تحط العقدة في المنشار زي ما مؤنس قالها وهو بيعمل نفس الحاجة وبيماطل وبيتمسك بالمنحل، وفي مواجهتهم لبعض الاتنين مبيعتذروش والاتنين بيصرخوا والاتنين محدش فيهم بيعترف بأي غلط ارتكبوه.

وفي النهاية وبعد ما بيتطلقوا بالفعل هي بتنهار تماماً وهو كمان بيبقى مهتم يعرف رد فعلها وهل هي منهارة زيه أو لأ.. حتى ابنهم اللي الحدوتة كلها ابتدت عشان خاطره هما الاتنين ناسيينه تماماً.. حازم مبيحاولش يسأل عليه وهنا سايباه للمربية أو لمؤنس ومشغولة بذاتها تماماً.

هما الاتنين شخصيات مهزوزة متلاعبة أنانيين مبيهتموش باللي حواليهم ومش بيهمهم غير هما هيستفيدوا ايه، هما الاتنين شخصيات متمحورة حوالين ذاتها وبيستغلوا اللي حواليهم أسوأ استغلال حتى لو كان اللي حواليهم دول أصلاً ناس سيئة هما طول الوقت بيعرفوا يعلوا عليهم ويطلعوا أسوأ.